سؤال عن الماجستير

السلام عليكم ورحمة الله وبركاته
تحياتي لكل طلبة قسم مصري
أنا خريجة 2009 وكان تقديري الحمدلله جيد جدا
السؤال اللي عايزة أسأله هل لو قدمت بأذن الله في الماجستير هستفاد وهل الماجستير هيضيفلي حاجة في مجال العمل وكده لأن أنا نفسي طبعا جدا أشتغل في مجالي
ياريت اللي يعرف يرد عليا ويبقي ليكم جزيل الشكر

شوفى يا خريجه بالنسبه للماجستير مافيش منه اى مشكله ومش هيضفليك كتير بل انك هتتعمقى فى موضوع واحد بس
هو اللى هتعرفى عنه كل حاجه بالتفصيل حسب الدكتور اللى انتى متابعه معاه ما هيقولك هتنفذى وبس
وبالنسبه لموضوع الشغل عاوزه تشتغلى ايه؟؟؟؟
انتى عارفه ان قسمنا ده بيخرج خمسين وظيفه ممكن نشتغلها بس الحمد لله مش طايلين ولا واحده فيهم قوليلى حاطه فى دماغك تشتغلى فى اى مجال بالظبط وانا احاول اقولك اللى يفيدك ان شاء الله
واهلا بيكى

شكرا لlast phaoro أنا كنت عايزة أشتغل مثلا في هيئة الأثاركادارية أو في موقع أثري وأعرف ناس من دفعتي أشتغلوا في موقع أثري وكده
أنا أي شغل في مجالي هيرضيني وهبقي سعيدة جدا بيه
بس يعني الماجستير هيؤهلني للشغل أسرع ولا لأ!

بالرغم كمان أني معايا كورسات انجليزي وكمبيوتر بس للأسف ملقتش شغل فقلت أتعمق في مجالي اكتر وأعمل الماجستير بس مش عارفة هستفيد ولا لأ لأن هيبقي هدفي بردو في الأخر هو الشغل

والله انا مش عايز اقولك الكلام المعروف وانه لازم تتعمقى والكلام ده بس صدقينى عشان تشتغلى فى موقع اثرى بقى من المستحيلات الا بطرق من تحت لتحت لكن بالمجهود استحاله
اسف بس دى الحقيقه لكن نصيحتى ليكى اتعمقى وكملى كدراسه واعملى الماجستير وبعدها كملى واشتغلى فى التدريس هو ده بس المتاح قدامك وهيبقى فى سنيييين مش سنه ولا اتنين ولا تلاته اقل واجب 5 او 6 سنين عشان تبتدى شغل كمعيده يعنى امشى فى حياتك الطبيعيه عادى جدا وكملى دراسه من اجل التدريس لن شغل صدقينى صعب اوى
انا عارف احساسك ومقدره تماما ومتاكد انك ممتازه فى حاجات كتير لان مافيش حد اتخرج من القسم ده فى المجال ده غير وفى نظرى انا انه عبقرى والديلي ان نسبه 80 فى الميه من الخريجين عايزين يكموا يعنى ما كانتش مجرد دراسه وانتهت وخلاص زى باقى الاقسام او الكليات كنت اتمنى اساعدك اكتر من كده بس دى الحقيقه وده اللى انا عملته انتى بتقولى كورسات انجليزى وكمبيوتر انا زياده عنك كمان روسى عشان تى اشتغل فى الارشاد ولما حاولت اشتغل فيه فعلا اشتغلت بس ما حسيتش بقيمتى كراجل بتاع اثار عقله مليان وعاوز يطلع كل اللى عنده لقيت نفسى بعمل حاجه مش مرتاح فيها مع ان فيها فلوس جميله وسيبتها ودلوقت اتجهت للدبلومه وبعدها الماجستير يمكن الاقى مكانى اللى بدور عليه قبل ما يروح هو كمان زى كل حاجه ما بتروح من تحت رجلينا

بس أنا أعرف أن اللي بيشتغلوا معيدين هما الأوائل معرفش ان اللي يكمل دراسته بعد 5سنين ممكن يبقي معيد!

بس عندك حق بصراحة في كل اللي أنت قولته
انا بس صعبان عليا أن الواحد بيحب المجال ده وفعلا كنت شاطرة فيه فهو ده اللي مزعلني

بس ان شاء الله تلاقى شغل قريب يا خريجة وفى الاثار

ممكن اقولك نصيحة مع انى لسة طالبة وما اعرفش اذا كنت هشتغل ولا طبعا مش هلاقى
بس فى مقولة بتقول (حب ما تعمل حتى تعمل ما تحب) فمن الممكن ان تعملى فى اى مجال احتياطى حتى تجدى العمل الذى يناسبك وربنا يوفقك
اما بالنسبةlast.pharou فهناك سؤال يحيرنى لماذا تركت الارشاد مع أنك تستطيع أن تعطى
فكرة صحيحة عن الاثارعكس المشتغلين بالارشاد وليس لديهم ادنى فكرة عن الاثر الذى يقومون بشرحة ويعتمدون فقط على ايجادتهم للغة التى يشرحون بها
أرجو الرد

شكرا للمصراوية بس مش من السهل أيجاد فرصة عمل لطالبة أثار يعني قصدي أنا مش بفهم الا في الأثار فهشتغل أيه يعني وعموما أنا حاولت في مجالات مختلفة بس حاسة أني مش هلاقي نفسي فيها لاني بحب الأثار جدا ونفسي طبعا أشتغل فيها

يالهوووووووووى انا اتعقدت والصراحة انا متعقدة من قبل ماادخل الكلية بس كلامكو خوفنى اوى مع انى فى اولى بس كان تحذير الناس ليا من الكلية بسبب الشغل وحاسة ان المجال دة كويس جدا يفيد فى الاحتكاك بالثقافات المختلفة وتغيير الفكرة السيئة لدى البعض عن مصر ودة دور الاثريين والمفروض يكون فى اهتمام بينا اكتر من كدة لان احنا عارفين ان فى ناس فى العالم ماتعرفش عن مصر الا بسبب الاهرمات والواقع ان مصر لا تملك تقدم كافى لمعرفة العالم بيها ولكنها تملك حضارة تميزها يارب الوضع يتغير وكلنا نشتغل عشان نتغير ونغير
معلش صدعتكو بس ادينى طلعت شوية من الى فى نفسى وان شاء اللة تشتغلى ياخريجة ونلحق بيكى ياااااااااااااااااارب

حقيقى يا ar_gogo كلامك كله صح وده فعلا دورنا كأثرين طبعا كان نفسى اقول كمصرين بس طبعا الحمد لله ان الوعى بدعنا مايةماية فيا رب على الاقل يكون عند الاثرين اهتمام
وان شاء الله كلنا هنشتغل فمتياسيش وربنا يوفقك

يارب يا مصراوية وانا بحاول ماياسش لعل وعسى حظى يكون كويس مع انى عارفة الى فيها
وربنا يوفقنا كلنا يارب

والله أنا أتعقدت جدا لأن كل اللي أشتغلوا كان عندهم وسطة
طب يعمل أيه اللي معندوش!الحل يفوض امره لله

وكمان بقي عندي أحباط جامد جدا وخايفة أعمل ماجستير ودكتوراه وبردو يبقي حالي هو هو وملاقيش شغل

السلام علكيم ورحمة الله وبركاتة

كلامي موجهه للي مازلو بيدرسوا وشايفين الوضع سيئ وهيجيلهم عقده

اجتهدوا حبوا مجالكم اعملوا اللى عليكم وسيبوا الباقي علي ربنا

وخدوا بالاسباب وذاكروا وتفوقوا واعملوا اللي تقدروا عليه

مينفعش انا افكر في حاجه واتمناها وابقي مستنيها وحياتي هتقف عليها وانا معملتلهاش اي حاجه

مبقاش طالع بمقبول وغيري جايب جيد جداً وابقي نفسي اشتغل قبلهم
مبقاش مكنتش مهتم بالدراسه ولا المجال وعاوز اشتغل واتفوق فيه

وصدقوني ربنا مش بيضيع مجهود حد

ونموا قدراتكم وخليكوا مختلفين عن غيركم

=========
بالنسبه للخريجين ووضعيه شغلهم

فعلا الحال حالياً لا يسر عدو ولا حبيب والدنيا كلها واقفه

بس انا بردوا اعمل اللى عليا وازود من قدراتي مدام بحب المجال واقدر أكمل فيه

لان ده فعلياً بيزود من قيمتك لما بتيجي تتقدمي لشغلانه

وأهم حاجه في مجال الاثار بتاعنا العلاقات

اعملوا علاقتا كويسه بكل اللى تقابلوهم
(فكم من محتقر احتيج اليه)

وان شاء الله الاوضاع هتتحسن قريب بإذن الله

وساعتها هكون انا مسلح نفسي وواقف علي رجليا
هوه اينعم وضعك يا خريجه كويس
يعني تقدير وكورسات وما الي ذالك ( ما شاء الله)

بس الفترة دي متضيعيهاش خدي التمهيدي وامشي في الماجستير

ده هيميزك أكتر عن الاف خريجين زيك

وان شاءالله التغييير قااااااااااااادم بس احنا نبدأ بنفسنا

وربنا يوفق الجميع

بصي يا خريجه 2009
انا اخدت تمهيدي الماجستير وبدور علي موضوع الماجستير ن شاء الله عشان اسجل
هو مش هيفيد لان الموضوع محتاج واسطه مش درجه علميه
بس لو حابه تعملي دراسات عليا اعمليها
انا مش استفدت حاجه من اللي بعمله
بس مبسوطه لان بحب كليتنا جدا بصرف النظر اننا مش بناخد حقوقنا في الشغل
وربنا يوفقك

اقتباس :

وأهم حاجه في مجال الاثار بتاعنا العلاقات

اعملوا علاقتا كويسه بكل اللى تقابلوهم
(فكم من محتقر احتيج اليه)

طيب ده مش يعتبر وصوليه
انى بتعرف على الناس علشان اوصل لهدفى
يعنى مصلحه من الدرجه الاولى وخلاص

اتمنى انى ازيد من ارائكم انا اعتقد ان انك تعملى احسن الماجستير بس لانك شايفة ان ده الاحسنلك من وجهة نظرك انتى مش علشان وجهات النظر التانية
وبعدين انا رائي ان عمل الماجستير والدكتوراة طبعا شرف لاى حد بيحب العلم ويحب يضيف ليه الى حد ما الاقى الشغل المناسب ليا او الى جانب شغلى
بس اهم حاجة انى اضيف فى العلم مش انى مجرد انى بعمل رسالة وخلاص علشان اخد درجة علمية والسلام لا بالعكس انى ابحث فى كل الموضوعات مش لازم علشان انى بكتب فى موضوع معين ان هو ده اللى ابحث فيه
لو انتى عايزة تبقى دكتورة متفوقة فانتى لازم تتابعى فى كل المجالات والموضوعات ولازم تكونى عارفة الجديد مش مجرد انك تركزى فى مادة علمية واحدة او انك تعتمدى بس على الدكتور اللى انتى متابعه معاه لا لازم تبينى انك حبه المجال ككل
حتى لو انتى من قسم مصرى وبحثى فى مجال الترميم او الاسلامى المهم يكون عندك خبرة ومعرفة
وده بيميز طبعا كل شخص لان فيه اللى بيحضروا الماجستير او اللى اخدوه واخدوا الدكتوراة وبيدرسوا ومن الاحراج لينا احنا الطلبة انهم مش بيكونوا عارفين حاجة ويحطنا احنا الطلبة قدام سؤال ازاى اخد الدكتور ده او الدكتورة ديه الدكتوراة وهيا مش عارفة حاجة والمصيبة انها او انه لما تسالى بيجاوبوا بكل ثقة وفخر مش عارفة
اظن ان دول مايستهلوش الشهادة
فانتى اعملى الحاجة اللى تحبيها وحسه انها هتضيف لبلدك مش لمجرد شهادة او لحد ماتلاقى شغل
وبلاش تمشى مع كلام العلاقات لان الانسان اللى كده بيكون منافق ووقت الشدة مش حيلاقى حد جنبه واعتمدى على الله وفكرى كويس مع نفسك قبل اى قرار ومش مهم رائ اى حد
وعذرا انى طولت عليكم

شكرا لكل الناس اللي ردت عليا طبعا وربنا معاكوا في الامتحانات يارب
بس أحب أسأل lovly girl بما أنها عملت الماجستيرأني مخلصة من سنة يعني بقالي سنة قاعدة في البيت فهل لو قدمت في التمهيدي هيبقي الموضوع صعب عليا أني أفتكروكده ولا أيه
وأرجو الرد