الله ياجماعة لما بمشي في الشارع بكون عايز أبكي من اللي بشوفه وبسمعه
معاكسات وأغاني في كل مكان وقهاوي وكافيتريات مليانة ناس
وستات ماشية نسيت تلبس أصلا وسجاير ودخان وحشيش اللي أصبح عادي جدا انك تشربه في الشارع ولا حول ولا قوة الا بالله
وفي البيت بقا تليفزيون مليان أفلام ومسلسلات تافهة وبتضيع الوقت علي الفاضي
وكليبات متخلفة زي اصحابها كل هدفها العري وبس وغيره وغيره
والله بجد الوضع خطير ..شئ محزن جدا
مش عارف لما نقابل الرسول صلي الله عليه وسلم علي الحوض يوم القيامة هنقوله
أيه؟ لما يقولنا كنتوا بتشوفوا ربنا بيتعصي في كل مكان وتسكتوا ليه؟
مش عارف هيكون أيه ردنا علي رسولنا صلي الله عليه وسلم
وبتخيل بردو الموقف اللي هنقف فيه قدام ربنا سبحانه وتعايل ويسألنا عن لحظة لحظة ضيعناها من عمرنا في شات علي النت وأغاني وأفلام ونظر الي الحرام
وغير ده كله لو مش بتنظر لحرام لو بتتفرج علي ماتش مثلا بتضيع حوالي ساعتين
من كل يوم بتشوف فيه ماتش
بالله عليك احسب كده كام ساعة ضيعتها قدام الماتشات والافلام والاغاني وكل ده
كل التفاهات اللي شغلونا بيها عن طاعة ربنا سبحانه وتعالي
زمان لما كنت بتفرج علي أفلام قبل ما ربنا يكرمني وأمسح كل الافلام والكلام الفاضي ده من جهازي كنت أسال نفسي والله السؤال ده
طب أنا لومت دلوقتي وأنا بتفرج علي الفيلم ده هيبقي شكلي ايه ساعتها قدام ربنا
وبعدين الشيطان ييجي يقوللي ياعم انت لسه صغير مش هتموت دلوقتي
والله ياجماعة ليا اصحابي نفس سني وأصغر توفاهم الله
يعني الموضوع اصبح عادي وبيحصل كل يوم بل كل لحظة
وأذكر واحد صاحبنا عمل حادثة واتقلبت بيه العربية وكان معاه واحد صاحبه
صاحبه ده مات وهو فضل عايش بفضل الله وساعتها كان مشغل الكاسيت علي أغاني وسبحان الله مش اتعظ بردو بموت صاحبه ده
وبعدها باسبوع بالضبط أو 8 أيام مات موتة عادية
وهو نايم في سريره
قلت سبحان الله زي ما يكون ربنا أعطي له فرصة الايام دي انه يتوب ويرجع
لربنا بعد ما شاف الموت بعينه
بس للأسف مش اتعظ بكل ده وربنا أعلم بحاله مات علي أيه
الشاهد من الكلام اننا في زمن التمحيص :يعني الاختيار والاصطفاء والمفاجاءة
وبمجرد ما ربنا يغضب عليك من معاصيك ممكن يقبض روحك فجأة
ودا مش بعيد علي ربنا
طبعا انا مش بقول الكلام ده علشان واحد يقول ياعم انت هتخنقنا ليه
الواحد عايز يعيش حياته؟
وبقولك والله دا مش تعصب ولا تضييق عليك بل خوف عليكم والله يا اخواني
وبعدين يعني انت هتعيش كام سنة ؟
نقول 100 وبعدها هيحصل ايه؟
هتموت وتعيش حياتك الابدية بقا
طيب وليه منخليش الدنيا زي الايام اللي بتبقي قبل الامتحانات
بنفضل نذاكر ونراجع مرة واتنين علشان ننجح
طيب ما احنا بردو في الدنيا دي في امتحان
والنتيجة في الاخرة باذن الله
قال تعالي في سورة الملك( تبارك الذي بيده الملك وهو علي كل شئ قدير.الذي خلق الموت والحياة ليبلوكم أيكم أحسن عملا وهو العزيز الغفور)
بالله عليكم ايامنا معدودة علينا ونفسي ربنا يجمعني بيكم في الفردوس الاعلي ان شاء الله
قوم دلوقتي ودمر اي شئ مخليك بعيد عن ربنا
لو سجاير ارميها ولو أغاني او أفلام اعملها ديليت من جهازك
علشان ربنا يرضي عننا ونرجع تاني أمة محمد في زمن العزة مش زمن الذل والمهانة
Report
الأحد 7 فبراير 2010 - 20:56
